ရန်ကုန်တိုင်းဒေသကြီး လမ်းမတော်မြို့နယ်နှင့် ဒလမြို့နယ်တို့သို့ ရန်ကုန်မြစ်အား ဖြတ်သန်းကာ ဆက်သွယ်တည်ဆောက်နေသော မြန်မာ - ကိုရီးယားချစ်ကြည်ရေး (ဒလ) တံတားစီမံကိန်းကို အပိုင်းသုံးပိုင်းခွဲကာ တည်ဆောက်နေပြီး ယခုအခါတွင် လုပ်ငန်းအားလုံး၏ ၂၀ ရာခိုင်နှုန်းပြီးစီးနေပြီဖြစ်ကြောင်း တံတားတည်ဆောက်ရေးအဖွဲ့ စီမံကိန်းရုံးမှ သိရှိရသည်။
“အခုကတော့ ဒလတံတား စီမံကိန်းက အပိုင်းသုံးပိုင်းစလုံး ပြန်လည်စတင်နေပြီဖြစ်ပါတယ်။ ပင်မတံတားအနေနဲ့ဆိုရင် ပြီးခဲ့တဲ့ နို၀င်ဘာလ နောက်ဆုံးအပတ်က ဘိုးပိုင်တစ်လုံးကို ကွန်ကရစ်လောင်းတာတွေ လုပ်ကိုင်နေတာဖြစ်ပါတယ်။ ဒီအတွက် ပင်မတံတားမှာ ဘိုးပိုင် စုစုပေါင်းဆိုရင် ၄၆ လုံးရှိတဲ့နေရာမှာ ဘိုးပိုင် ၂၇ လုံး ပြီးစီးဖြစ်လို့ ကွန်ကရစ်လောင်းနေပြီဖြစ်ပါတယ်။ ဒီတံတတားကြီးကို ကိုရီးယားနိုင်ငံရဲ့ တည်ဆောက်ရေး Quality Control အတိုင်း Quality မီ ခိုင်ခံ့ကောင်းမွန်သော တံတားကြီးတစ်စင်း ပေါ်ပေါက်လာဖို့အတွက် ဆောင်ရွက်နေပါတယ်။ ဒါ့အပြင် လုပ်ငန်းဆောင်ရွက်တဲ့နေရာမှာလည်း တည်ဆောက်ရေးလုပ်ငန်းမှာ ပါ၀င်နေတဲ့ လုပ်သားတွေ Safety ကို လုံခြုံစိတ်ချစွာဆောင်ရွက်နိုင်အောင် ကြီးကြပ်ဆောင်ရွက်နေပါတယ်။ ကျွန်တော်တို့ ဒီတံတားကြီးကို ၂၀၂၂ ခုနှစ်အောက်တိုဘာလမှာ အားလုံးပြီးစီးအောင် ဆောင်ရွက်သွားနိုင်လို့ မျှော်မှန်းပြီး လုပ်ထားပါတယ်” ဟုဆောက်လုပ်ရေး ၀န်ကြီးဌာန၊ တံတားဦးစီးဌာန ဒုတိယညွှန်ကြားရေးမှူးချုပ် ဦးကျော်ကောင်းချို က ပြောသည်။
ယခုအခါတွင် မြန်မာ-ကိုရီးယား ချစ်ကြည်ရေး ဒလတံတားကြီးကို အပိုင်းသုံးပိုင်းဖြင့် ဆောင်ရွက်နေပြီး လုပ်ငန်းပြီးစီးမှု ၂၀ ရာခိုင်နှုန်း ရှိလာပြီဖြစ်သည်။မြတ်နိုးသူ ဆောက်လုပ်ရေးမှ တာ၀န်ယူ ဆောင်ရွက်နေသည့် ပထမ အပိုင်းဖြစ်သော ဒလမြို့နယ် ရန်ကုန်မြစ်ဆိပ်ကမ်းအနီး ဗိုလ်မင်းရောင်လမ်းပေါ်၊ ဒလဘက်အခြမ်း ချဉ်းကပ်တံတားအပိုင်းတွင် ကမ်းကပ်ခုံ A 1 အပိုင်း Abutment Bored Pile တူးဖော်ခြင်း/ ဘိုးပိုင်တူးဖော်ခြင်း/ ချဉ်းကပ်တံတား Bored Pile တူးဖော်ခြင်းလုပ်ငန်းများ / ကွန်ကရစ်လောင်းခြင်းလုပ်ငန်းများပါ၀င်ပြီး ထိုအပိုင်းတွင် Pile တိုင် (၁၄) ခုတည်ဆောက်ခြင်းနှင့် လေးလမ်းသွား တံတားချဉ်းကပ်လမ်း တည်ဆောက်ခြင်းတို့ ပါ၀င်ကြောင်း သိရသည်။
အလားတူ ဒုတိယ ရန်ကုန်ဘက်ကမ်းအပိုင်းကို ရွှေတောင်ဆောက်လုပ်ရေးမှ တာ၀န်ယူတည်ဆောက်နေပြီး လမ်းမတော်မြို့နယ် ဘုန်းကြီးလမ်းထိပ် ရန်ကုန်မြစ်ဘေး စီမံကိန်းနေရာတွင် Bored Pile တူးဖော်ခြင်း လုပ်ငန်းများ/ကွန်ကရစ်လောင်းခြင်းနှင့် သံမဏိသံခြင်းကြီးများ ချခြင်းလုပ်ငန်းများ ပါ၀င်ကာ စက်ယန္တာယားကြီးများဖြင့် ဆောင်ရွက်နေကြောင်း သိရသည်။
ထိုရန်ကုန်ဘက်ခြမ်းတံတား တည်ဆောက်ရေးတွင် ဒလဘက်မှ ဘုန်းကြီးလမ်းအတိုင်း နှစ်လမ်းသွား တံတားတစ်စင်း/ ဒလဘက်မှ ကမ်းနားလမ်းအတိုင်း ရန်ကုန်မြို့တွင်း ဆူးလေဘုရားဘက်သို့ တစ်လမ်းမောင်း တံတားတစ်စင်း/ ဒလဘက်မှ ကမ်းနားလမ်းအတိုင်း အလုံမြို့နယ်ဘက်သို့တစ်လမ်းမောင်း တံတားတစ်စင်း စုစုပေါင်းတံတားသုံးစင်းဖြင့် ဖြာဆင်းကာ တည်ဆောက်သွားမည်ဖြစ်ကြောင်းသိရသည်။
တတိယအပိုင်း ပင်မတံတား၏ PY 1 နှင့် PY 2 အပိုင်ရေလည်ပိုင်း ခန်းဖွင့်တာဝါတိုင်ကြီးနှစ်တိုင်နှင့် ကေဘယ်လ်ကြိုးဆိုင်းတံတားကို နိုင်ငံတကာအဆင့်မီ နည်းပညာ ကုမ္ပဏီကြီးတစ်ခုဖြစ်သော CCEC တရုတ်ကုမ္ပဏီမှ တည်ဆောက်နေခြင်းဖြစ်ပြီး နည်းပညာအားလုံးသည် နိုင်ငံတကာ အဆင့်မီစံချိန်စံညွှန်းအတိုင်း ကိုရီးယား နည်းပညာကို အသုံးပြုပြီး ဆောင်ရွက်နေခြင်းဖြစ်ကြောင်း တံတား ဦးစီးဌာန မှသိရသည်။
ထိုတံတားကြီး၏ ရေလည်အပိုင်းတာဝါတိုင်နှစ်တိုင်၏ အကွာအဝေးသည် မီတာ ၃၇၀ ခန်းဖွင့်အကျယ်ရှိကြောင်း သိရသည်။ တံတား၏ ဒလဘက်ခြမ်း ချဉ်းကပ်တံတားအရှည်သည် ၅၇၇ မီတာရှိပြီး ရန်ကုန်ဘက်ခြမ်း ချဉ်းကပ်တံတား အရှည်သည် ၆၀၁ မီတာရှိကာ ရေလည်အပိုင်း ပင်မတံတား အရှည်သည်မီတာ ၆၉၀ ရှည်ရှိသည် စုစုပေါင်းတံတားရှည်သည် ပေ ၆၁၄၄ ပေရှိသည်။ ရေလမ်းကင်းလွတ်ခွင့် အမြင့်သည် ၄၉ မီတာ (ပေ ၁၆၀ ) ရှိသည်။ တံတားတွင်တစ်ဖက်လျင် ၄ မီတာ ကျယ်၀န်းလျက်ရှိသည့် လူသွားလမ်း ပလက်ဖောင်း အသွား/အပြန်ပါရှိသည်။ လေးလမ်းသွား တံတားဖြစ်ကြောင်း သိရသည်။
ထိုတံတားစီမံကိန်းသည် မူလတွင် အမေရိကန်ဒေါ်လာ သန်း ၁၃၇ ဒသမ ၈၃၃ ဖြစ်ပြီး လက်ရှိတွင် ပင်မတိုင်ကြီးများ နောက်ဆုတ်ကာ ၂၅၁ မီတာအကျယ်မှ ၃၀၁ မီတာအထိ တိုးချဲ့ကာဆောင်ရွက်ရသဖြင့် အမေရိကန်ဒေါ်လာ သန်း ၂၀ ထပ်မံကုန်ကျမည့်အတွက် စုစုပေါင်းအမေရိကန်ဒေါ်လာ သန်း ၁၅၇ ဒသမ ၈၃၃ အကုန်ကျခံ တည်ဆောက်နေခြင်းဖြစ်ကြောင်း ထိုငွေကို ကိုရီးယားနိုင်ငံ EDCS ချေးငွေ အတိုးနှုန်း ၀ ဒသမ ၀၁ ရာခိုင်နှုန်းဖြင့် ရယူ၍ နှစ် ၄၀ ချေးငွေဖြင့် တည်ဆောက်သွားမည်ဖြစ်သည်။ Main ကန်ထရိုက်တာသည် ကိုရီးယားနိုင်ငံ၏ GS Engineering Group မှ အဓိက တာ၀န်ယူ တည်ဆောက်ခြင်းဖြစ်ကြောင်း တံတားဦးစီးဌာန မှသိရှိရသည်။
