ရန်ကုန်တိုင်းဒေသကြီး၊ ဒေါပုံမြို့နယ်ရှိ ဥပဒေရုံးနှင့် ဝန်ထမ်းအိမ်ရာကို ရန်ကုန်တိုင်းဒေသကြီး အစိုးရအဖွဲ့၏ ခွင့်ပြုရန်ပုံငွေကျပ် သန်း ၂၇၀ ဖြင့်တည်ဆောက်ပြီးစီး၍ မတ်လ ၅ ရက်နေ့ မွန်းလွဲ ၁ နာရီအချိန်တွင် ဖွင့်ပွဲအခမ်းအနား ကျင်းပပြုလုပ်ခဲ့ကြောင်း သိရသည်။
အဆိုပါအဆောက်အအုံကို ထွန်းတောက်အောင်ဇမ္ဗူ ကုမ္ပဏီလီမိတက်က တာဝန်ယူတည်ဆောက်ခဲ့ခြင်းဖြစ်ပြီး အလျား ၆၅ ပေ၊ အနံ ၄၅ ပေ၊ အမြင့် ၃၂ ပေရှိ၍ ၃ ထပ် RC အဆောက်အဦးဖြစ်သည်။
ထိုအခမ်အနားတွင် ပြည်ထောင်စုရှေ့နေချုပ် ဦးထွန်းထွန်းဦးက အဖွင့်အမှာစကားပြောရာတွင် တိုင်းဒေသကြီးဥပဒေချုပ်၊ ဥပဒေအရာရှိ၊ ခရိုင်ဥပဒေအရာရှိများ၏ ကြီးကြပ်ဆောင်ရွက်မှုများနှင့်အတူ ယခုလို ကောင်းကောင်းမွန်မွန် ဖွင့်လှစ်နိုင်သည့်အတွက် ဂုဏ်ယူဝမ်းမြောက်ပါကြောင်း၊ တိုင်းဒေသကြီးနှင့် ပြည်နယ် အသီးသီးတွင် ဥပဒေရုံးများနှင့် မြို့နယ်ဥပဒေရုံးများအား ၁၉၇၄ ခုနှစ်မှ စတင်ဖွဲ့စည်းခဲ့ပြီး ဘတ်ဂျက်ရရှိမှုပေါ် မူတည်၍ တစ်နှစ်တွင် ၄ ရုံး၊ ၅ ရုံးလောက်သာ တည်ဆောက်နိုင်ခဲ့ကြောင်း၊ သို့သော် ၂၀၁၀ခုနှစ် နောက်ပိုင်းတွင် ဥပဒေရုံးများ၏ အခြေအနေများ၊ အခက်အခဲများနှင့် အမှန်တကယ် ဖြစ်ပေါ်နေသော အနေအထားများအား တိုင်းဒေသကြီးနှင့် ပြည်နယ်များ အစိုးရများ၏ ဘတ်ဂျက်ဖြင့် ဆောင်ရွက်နိုင်ခဲ့ကြောင်း ပြောကြားသည်။
ထို့နောက် ဗိုလ်မင်းဗိုလ်ဆောက်လုပ်ရေး ကုမ္ပဏီလီမိတက်မှ တာဝန်ယူတည်ဆောက်မည့် ရန်ကုန်တိုင်း၊ ဒေါပုံမြို့နယ်ရှိ ဥပဒေချုပ်ရုံး ဝန်ထမ်းအိမ်ရာ ၄ ခန်းတွဲ ၆ ထပ် RC အဆောက်အဦအား ဆောက်လုပ်နိုင်ရန် ပန္နက်တော်တင်ပေးခဲ့ခြင်းဖြစ်ကြောင်း သိရသည်။
မြန်မာနိုင်ငံသည် လက်ရှိ ၁၀ နှစ်ကာလအတွင်း ဒေါပုံမြို့နယ်အပါအဝင် ဥပဒေရုံး ၁၁၅ ရုံးနှင့် ဝန်ထမ်းအိမ်ရာ ၈၉ လုံးအထိ တိုးပွားဆောက်လုပ်နိုင်ခဲ့ပြီး လက်ရှိတွင် ဥပဒေရုံး ၂၉၉ ရုံးနှင့် ဝန်ထမ်းအိမ်ရာ ၁၁၂ လုံးအထိ ဖွင့်လှစ်နိုင်ပြီဖြစ်ကြောင်း သိရသည်။
