ဂျပန်တည်ဆောက်ရေးကုမ္ပဏီများ ပဲခူးမြစ်ကူးတံတား (သန်လျင်တံတား အမှတ်- ၃) တည်ဆောက်မည်

ပဲခူးမြစ်ကူးတံတား(သန်လျင်တံတား အမှတ်-၃) အား လေးလမ်းသွား Cable Stayed တံတားအဖြစ် အဆင့်သုံးဆင့်ခွဲခြားကာ ဂျပန်တည်ဆောက်ရေးကုမ္ပဏီများက တစ်ပြိုင်နက် တည်ဆောက်သွားမည်ဖြစ်ကြောင်း ဆောက်လုပ်ရေးဝန်ကြီးဌာန၊ ဒုတိယဝန်ကြီး ဦးကျော်လင်း၏ ပြောကြားချက်အရ သိရသည်။

        ပဲခူးမြစ်ကူးတံတား(သန်လျင်တံတား အမှတ်-၃) အား လေးလမ်းသွား Cable Stayed တံတားအဖြစ် အဆင့်သုံးဆင့်ခွဲခြားကာ တည်ဆောက်သွားမည်ဖြစ်ပြီး ကျန် Package များဖြစ်သည့် ရန်ကုန်ဘက်ကမ်းရှိ ခုံးကျော်တံတား တည်ဆောက်ရေးလုပ်ငန်းများအပါအဝင် တံတားတည်ဆောက်ရေး လုပ်ငန်းသုံးဆင့်အား တစ်ပြိုင်နက်တည် ဆောက်သွားမည်ဖြစ်သည်။

        “ရန်ကုန်မြို့ရဲ့ ဖွံ့ဖြိုးလာမှုနဲ့အတူ သီလဝါအထူးစီးပွားရေးဇုန်နဲ့ ဆိပ်ကမ်းကို ကုန်ပစ္စည်းတွေ သယ်ယူပို့ဆောင်တဲ့နေရာမှာ ခံနိုင်ဝန်ကန့်သတ်ချက်ရှိခဲ့လို့ ခေတ်မီတံတား အသစ်တစ်စင်း တည်ဆောက်ဖို့ လိုအပ်လာပါတယ်။ တိုးတက်များပြားလာတဲ့ ယာဉ်စီးရေကြောင့် လက်ရှိတံတားပေါ်ဖြတ်သန်းရာ မှာ ယာဉ်ကြောပိတ်ဆို့မှုတွေ ရှိနေလို့ အဆင်မပြေမှုများစွာရှိနေခဲ့ပါတယ်။ ဒါကြောင့်မို့ ပဲခူးမြစ်ကူး တံတား(သန်လျင်တံတားအမှတ်- ၃) ကို လေးလမ်းသွား Cable Stayed တံတားအဖြစ် အဆင့်သုံးဆင့်ခွဲခြားပြီး ဂျပန်တည်ဆောက်ရေးကုမ္ပဏီများမှ တစ်ပြိုင်နက်တည် ဆောက်သွားမှာဖြစ်ပါတယ်” ဟု ဆောက်လုပ်ရေးဝန်ကြီးဌာန၊ ဒုတိယဝန်ကြီး ဦးကျော်လင်းက ရန်ကုန်ဘက်ကမ်းရှိ ခုံးကျော်တံတား ပန္နက်တင်ခြင်းအခမ်းအနားတွင် ပြောကြားခဲ့သည်။

        ဂျပန်နိုင်ငံချေးငွေအပါအဝင် စုစုပေါင်းအမေရိကန်ဒေါ်လာ သန်း ၃၀၀ ကျော်ဖြင့် တည်ဆောက်မည့် ပဲခူးမြစ်ကူးတံတား(သန် လျင်တံတားအမှတ် ၃ ) စီမံကိန်းအား Package 1,2 & 3 အဖြစ် အဆင့်အလိုက် တည်ဆောက်သွားမည်ဖြစ်သည်။

        ပဲခူးမြစ်ကူးတံတား(ရန်ကုန်-သန်လျင် တံတား အမှတ် ၃) အား ပင်မတံတား အရှည် ၂၀၃၁မီတာအရှည်ရှိပြီး Package 1 မှာ ၁၃၁၂ မီတာ၊ Package 2 မှာ ၁၃၆၃ မီတာ၊ Package 3 မှာ အရှည် ၈၂၅ မီတာရှိ ရန်ကုန်ဘက်ကမ်းရှိ ဂုံးကျော်တံတားတည်ဆောက်ရေး လုပ်ငန်းတို့ဖြစ်ကြောင်း သိရသည်။

        ပဲခူးမြစ်ကူးတံတား (သန်လျင်တံတား-အမှတ်၃) စီမံကိန်းတည်ဆောက်ရန်အတွက် ဂျပန်နိုင်ငံမှ ချေးငွေအမေရိကန် ၂၈၂ ဒသမ ၅၄၀ သန်းနှင့် မြန်မာနိုင်ငံဘက်မှ ထည့်ဝင်ငွေ ဒေါ်လာ ၄၀ ဒသမ ၆၆၆ သန်း စုစုပေါင်း ဒေါ်လာ ၃၂၃ ဒသမ ၂၀၆ သန်းဖြင့် ၂၀၂၃ ခုနှစ်တွင် လုပ်ငန်းပြီးစီးရန် လျာထားကြောင်း ဆောက်လုပ်ရေးဝန်ကြီးဌာနမှ သိရသည်။

        လက်ရှိအသုံးပြုနေသည့် သန်လျင်တံတား အမှတ် ၁ သည် ၁၉၉၃ ခုနှစ်က တည် ဆောက်ဖွင့်လှစ်ထားသည့် မီးရထားလမ်းနှင့် ကားလမ်းတံတားတို့ ပေါင်းစပ်တည် ဆောက်ထားခြင်းဖြစ်သည်။

        သန်လျင်တံတား အမှတ်(၃) ကို ပဲခူးမြစ်ပေါ်မှ ဖြတ်သန်း၍ သန်လျင်မြို့နယ်နှင့် သာကေတမြို့နယ်တို့ကို ဆက်သွယ်တည်ဆောက်မည်ဖြစ်ပြီး သန်လျင်တံတားအမှတ် (၁) ၏ အောက်ဘက် ၁၂၅ မီတာအကွာတွင် တည်ဆောက်မည်ဖြစ်သည်။

        သာကေတနှင့် သန်လျင်မြို့ကို ဆက်သွယ်မည့် ယင်းတံတားအရှည်မှာ ၁၉၂၈ မီတာရှိပြီး ပင်မတံတားအရှည်မှာ ၁၂၂၄ မီတာရှည်လျားသည်။ သာကေတဘက်ခြမ်း ချဉ်းကပ်တံတားအရှည်မှာ မီတာ ၃၀၀ ရှိကာ သန်လျင်ဘက်ခြမ်းတွင် ၄၀၄ မီတာဖြင့် တည်ဆောက်သွားမည်ဖြစ်သည်။ Fly Over Bridge ချဉ်းကပ်တံတားအပိုင်းတွင် သာကေတဘက်ခြမ်း၌ ၅၄၇ မီတာ၊ သန်လျင်ဘက်ခြမ်းတွင် ၁၈၈ မီတာရှိပြီး လေးလမ်းသွားပင် မတံတားအကျယ်မှာ ၂၄ မီတာ၊ နှစ်လမ်းသွား Fly Over Bridge အကျယ်မှာ ၁၂ ဒသမ ၅ မီတာ (ကုန်းပေါ်အပိုင်း) နှင့် တစ်လမ်းသွား One Ramp Bridge အကျယ်မှာ ၅ ဒသမ ၅၇ မီတာ (ကွေ့ဝိုက်၍ တက်မည့်လမ်း) ဖြစ်သည်။ တံတား၏ကိုယ်ထည်ကို Steel Box Girder Steel Box Girder ဖြင့်ဆောက်လုပ် မည်ဖြစ်ပြီး အုတ်မြစ်ကို Steel Pipe Sheet Pile ဖြင့် တည်ဆောက်မည်ဖြစ်ကာ ယာဉ်တစ်စီးစီ၏ ခံနိုင်ဝန်မှာ ၇၅ တန်သတ်မှတ် ထားသည်။