ဘိလပ်မြေစက်ရုံ အများစု ရပ်တန့်သဖြင့် ဈေး အဆမတန် တက်လာ

ပြည်တွင်းရှိ ဘိလပ်မြေစက်ရုံအများစု မလည်ပတ်နိုင်တော့သဖြင့် ဘိလပ်မြေဈေးနှုန်းမှာ တနှစ်အတွင်း ၅၀ ရာခိုင်နှုန်း ထိ ဈေးတက်လာခဲ့ပြီး ယခုနှစ် ဇန်နဝါရီလဆန်းမှစ၍ တအိတ်လျှင် ကျပ် တသောင်းဝန်းကျင် ဈေးပေါက်နေကြောင်း ဆောက်လုပ်ရေးလုပ်ငန်းရှင် အချို့ထံက သိရသည်။

အာဏာမသိမ်းခင် ဖေဖော်ဝါရီလအထိ ဘိလပ်မြေ တအိတ်လျှင် ကျပ် ၅၀၀၀ ဝန်းကျင်သာ ရှိခဲ့သော်လည်း ယခုအခါ ဘိလပ်မြေ တအိတ်လျှင် ကျပ် တသောင်းဝန်းကျင် ဖြစ်လာပြီး၊ လျှပ်စစ်မီးမရသဖြင့် စက်ရုံများ မလည်နိုင်ခြင်းက အဓိက အကြောင်းအရင်းဖြစ်ကြောင်း သိရသည်။

အမည်မဖော်လိုသော ဆောက်လုပ်ရေးလုပ်ငန်းရှင်တဦးက “ပြည်တွင်းမှာ ဘိလပ်မြေစက်ရုံ အများစုက မလည်ပတ် နိုင်တော့ဘူး။ ရပ်နေကြပြီ။ ဒါကြောင့် ဈေးက ထိုးတက်သွားတာ ဒီဇင်ဘာလလောက်က စတာ။ စက်ရုံတွေကို လျှပ်စစ် မီး မပေးနိုင်တော့ စက်ရုံအများစုက ရပ်သွားတာ၊ ဒီဇယ်နဲ့ လည်ပတ်ဖို့ကလည်း မလွယ်ဘူး။ နောက်တခါ ဝန်ထမ်းတွေ စီဒီအမ်ကြောင့်လည်း ပါတယ်” ဟု ပြောသည်။

လက်ရှိ ပြည်တွင်းဈေးကွက်ရှိ ဘိလပ်မြေဈေးများမှာ အသုံးပြုမှုများသော

ဆင်နှစ်ကောင်အမှတ်တံဆိပ် ဘိလပ်မြေ တအိတ် ၁၀၅၀၀ ကျပ်၊

အယ်လ်ဖာ ဘိလပ်မြေ တအိတ်လျှင် ၉၅၀၀ ကျပ်၊

ကြံ့နှစ်ကောင်တံဆိပ် ဘိလပ်မြေ တအိတ် ၉၈၀၀ ကျပ်၊

အပါချီတံဆိပ် ဘိလပ်မြေ မှာ ၉၃၀၀ ကျပ်အထိ

ဈေးမြင့်တက်လျက်ရှိသည်။

ပြည်တွင်း အိမ်ဆောက်ပစ္စည်း အရောင်းဆိုင်ရှင် တဦးက “အရင်ကဆို ဆင်နှစ်ကောင် တံဆိပ်တောင် ၅၅၀၀ လောက် ပဲ ရှိတာ။ အခုက ၁ သောင်းကျော်။ အရင်က တအိတ် ၅ ထောင်ဝန်းကျင်နဲ့ ရတာကို အခု ၈၀၀၀ အောက်တောင် မရှိ တော့ဘူး။ ဈေးကွက်မှာ ပစ္စည်းတွေလည်း ပြတ်နေတယ်” ဟု ဧရာဝတီကို ပြောသည်။

ဘိလပ်မြေဈေးနှုန်းများ နှစ်ဆနီးပါး ဈေးတက်သွားခြင်းကြောင့် လက်ရှိ တည်ဆောက်နေသော ဆောက်လုပ်ရေး လုပ် ငန်းများ တွက်ခြေမကိုက် ဖြစ်နေကြပြီး၊ လုပ်လက်စလုပ်ငန်းများ ပြီးဆုံးပါက ဆက်လက် လုပ်ဆောင်နိုင်မည် မဟုတ် ကြောင်း ဆောက်လုပ်ရေး လုပ်ငန်းရှင်အချို့က ဆိုသည်။

မင်္ဂလာတောင်ညွှန့်မြို့နယ်ရှိ အုတ်၊သဲ၊ ကျောက် ရောင်းဝယ်ရေး ဆိုင်ပိုင်ရှင်တဦးကလည်း “ဈေးကွက်ကတော့ သိပ် မတည်ငြိမ်ဘူးဗျ။ မနက်တမျိုး ညတမျိုးနဲ့ ကျပ် ၁၀၀၊ ကျပ် ၂၀၀ လောက် ကစားနေတယ်။ ကျလည်း ကျပ် ၁၀၀၊ ၂၀၀၊ တက်လည်း ကျပ် ၁၀၀၊ ၂၀၀ ပေါ့။ ဘိလပ်မြေကတော့ သူ့အမျိုးအစားပေါ် မူတည်ပြီးတော့ ဈေးကွာတယ်။ ပြည်ပက သွင်းတာတော့ ဆင်တမျိုးပဲရှိတယ်။ သူကတော့ တအိတ်ကို ကျပ် ၁ သောင်းလောက် ရှိတယ်။ အဝယ် လည်းကျဲသလို ပစ္စည်းအဝင်ကလည်း နည်းတယ်။ အဲ့ဒီတော့ ဈေးနူန်းတွေ ကွာဟသွားတဲ့ တာဗျ”ဟု ပြောသည်။

ပြည်ပမှ SCG ဆင်တံဆိပ် ဘိလပ်တမျိုးသာရှိပြီး ပြည်တွင်းထုတ် ဘိလပ်မြေများမှာ အယ်လ်ဖာ၊ ကြံ့နီ၊ မြင်းခေါင်း အစရှိသဖြင့် တံဆိပ်များစွာရှိပြီး လက်ရှိတွင် ဈေးကွက်အတွင်းသို့ ပြည်တွင်းထုတ် ဘိလပ်မြေများကလည်း ယခင် ထက် သိသိသာသာ ဝင်ရောက်မှု နည်းပါးနေ ကြောင်း ၎င်းကပြောသည်။

မြန်မာနိုင်ငံတွင် ပုဂ္ဂလိကပိုင် ဘိလပ်မြေစက်ရုံ ၁၇ ရုံနှင့် နိုင်ငံပိုင် စက်ရုံ ၃ရုံ ရှိပြီး တနှစ်လျှင် တန်ချိန် ၉ သန်း အထိ ထုတ်လုပ်နိုင်သည်ဟု စက်မှုဝန်ကြီးဌာနမှ တာဝန်ရှိသူများက ပြောဆိုကြပြီး တနိုင်ငံလုံး ဘိလပ်မြေ လိုအပ်ချက်မှာ တနှစ်လျှင် တန်ချိန် ၁၁သန်းခန့်ရှိရာ ပြည်ပမှနေ၍ နှစ်စဉ် တန်ချိန် ၁ သန်းခန့် တင်သွင်းနေရသည်။

ဧရာဝတီ