ချင်းပြည်နယ်အတွင်းသွားလာရာတွင် အဓိကကျသည့် စစ်ကိုင်းတိုင်းဒေသကြီး ကလေးမြို့နှင့်ချင်းပြည်နယ်မြို့တော် ဟားခါးသွားကားလမ်းအဆင့်မြှင့်တင်ခြင်းလုပ်ငန်းကို အမြန်ဆုံးအကောင်အထည်ဖော်နိုင်ရန် ချင်းပြည်နယ်အစိုးရမှ သက်ဆိုင်ရာဝန်ကြီးဌာနအား ကူညီသွားမည်ဖြစ်ကြောင်း သိရသည်။
"ဆောက်လုပ်ရေးဝန်ကြီးဌာန လမ်းဦးစီးဌာနက ကြီးကြပ်ဆောင်ရွက်သွားမှာဖြစ်ပါတယ်။ လုပ်ငန်းလုပ်ကိုင်မှုကိုတော့ တင်ဒါခေါ်ယူဆောင်ရွက်သွားမှာပါ။ လမ်းအဆင့်မြှင့်တင်တဲ့လုပ်ငန်းကို အမြန်ဆုံးအကောင်အထည်ဖော်ဆောင်ရွက်နိုင်ဖို့ ကျွန်တော်တို့ကြိုးစားနေပါတယ်" ဟု ချင်းပြည်နယ်ဝန်ကြီးချုပ်ရုံးမှ တာဝန်ရှသူတစ်ဦးက ဖေဖော်ဝါရီလ ၁၆ ရက်တွင် ပြောကြားထားပါသည်။
ချင်းပြည်နယ်အတွင်း အဓိကကျသည့် ကလေး-ဟားခါးကားလမ်းအဆင့်မြှင့်တင်ခြင်းလုပ်ငန်းကို ယခုပွင့်လင်းရာသီတွင် စတင်နိုင်ရန် ကြိုးစားလျက်ရှိပြီး အဆိုပါလုပ်ငန်းကို ကမ္ဘာ့ဘဏ်ချေးငွေအမေရိကန်ဒေါ်လာသန်း ၂၀၀ ဖြင့် ဆောင်ရွက်မည်ဖြစ်သည့်အတွက် သဘာဝပတ်ဝန်းကျင်ထိခိုက်ပျက်စီးမှုနှင့် လူမှုပတ်ဝန်းကျင်ထိခိုက်ပျက်စီးမှုတို့ကို နည်းနိုင်သမျှနည်းအောင် ဆောင်ရွက်သွားမည်ဖြစ်ပါသည်။
"ကလေး-ဖလမ်း-ဟားခါးကားလမ်းတစ်လျှောက်မှာရှိတဲ့မြို့တွေ၊ လမ်းဘေးဝဲယာမှာရှိတဲ့ကျေးရွာပေါင်း ၃၀ တို့ရဲ့ သဘာဝပတ်ဝန်းကျင်ထိခိုက်ပျက်စီးမှု၊ လူမှုပတ်ဝန်းကျင်ထိခိုက်မှုတွေကို ကွင်းဆင်းစစ်တမ်းကောက်ယူသွားမှာဖြစ်ပါတယ်" ဟု Cardno မှ Survay and RAP Social Specialist ဒေါ်သက်ထားမြင့်က ပြောကြားထားပါသည်။
ကလေး-ဖလမ်း-ဟားခါးကားလမ်းရှည်သည် ၁၁၅ မိုင်ဝန်းကျင်ရှိသော်လည်း မိုးရာသီကာလများတွင် တောင်ပြိုလမ်းပိတ်နေမှုများ၊ ကားလမ်းဗွက်ထနေမှုများ မကြာခဏဖြစ်တတ်ပြီး နွေနှင့်ဆောင်းကာလများတွင် ဖုန်ထူသောလမ်းများက အများစုဖြစ်ကြောင်း သိရသည်။
