အစိုးရ၏လက်ကျန် ၂ နှစ်သက်တမ်းအတွင်း တံတားအစင်းပေါင်းထောင်ချီဆောက်လုပ်ရန်ရှိ

အစိုးရ၏လက်ကျန် ၂ နှစ်သက်တမ်းအတွင်း တံတားအစင်းပေါင်းထောင်ချီဆောက်လုပ်ရန်ရှိကြောင်း ဆောက်လုပ်ရေးဝန်ကြီးဌာန ဒုတိယဝန်ကြီးဦးကျော်လင်းကပြောသည်။

လက်ရှိတွင် တစ်နိုင်ငံလုံး အတိုင်းအတာဖြင့် တံတားပေါင်း ၆၇ စင်းဆောက်လုပ်နေသည်ဟု ဦးကျော်လင်းက ဆိုသည်။
 
‘‘ အဲဒီထဲမှာသရက်-အောင်လံလိုတံတားကြီးတွေ ပါပါတယ်။ ပုသိမ်တံတားလိုဟာမျိုးပါပါတယ်။ နောက်တစ်ခါ ဝါးခယ်မတံတားတို့၊ ရွှေလောင်းတံတားတို့၊ ပေ ၂,၀၀၀ ကျော်၊ ၃,၀၀၀ တံတားအရှည်ကြီးတွေပါပါတယ်’’ ဟု ၎င်းကပြောသည်။

 မေလ ၁၇ ရက်ကနေပြည် တော် ပြန်ကြားရေးဝန်ကြီးဌာန ၌ နိုင်ငံတော်အစိုးရ၏ ပြည်သူ့အတွက် တတိယတစ်နှစ်တာအတွင်းဆောင်ရွက်ခဲ့မှုများနှင့် ပတ်သက်၍ပြုလုပ်သော သတင်းစာရှင်းလင်းပွဲအတွင်း ၎င်းက ထည့်သွင်းပြောကြားခြင်းဖြစ်သည်။

ထို့အပြင် ထပ်မံဆောက်လုပ်မည့် တံတားများအနက် အကြီးစားတံတားအစင်းရေ ၂၀၀ ခန့်ပါဝင်မည်ဖြစ်ပြီး တံတားအကြီး၊ အသေးအမျိုးအစားစုံ ပါဝင်မည်ဟု ၎င်းက ရှင်းပြသည်။

 ‘‘နောက်ထပ်လာမယ့် ၂ နှစ် တာကာလအတွင်းမှာ ထပ်မံတည်ဆောက်သွားမယ့်ချင်းတွင်းမြစ်ကူးတံတား၊ ပင်မတံတားလိုဟာမျိုး ရှိပါမယ်။ နောက် ရန်ကုန်မှာရှိတဲ့ ဆိပ်ကြီးခနောင်တိုနဲ့ ဒလ နဲ့ကူးမယ့်တံတားမျိုးစသည်ဖြင့် အလားတူ ဒီလိုတံတားတွေရှိတဲ့အတွက် တံတားအစင်းပေါင်း ၂၀၀ ကတံတားအကြီးတွေဖြစ်ပါတယ်။ တံတားပေါက်စလေးတွေ နဲ့ပေါင်းလိုက်ရင်တံတားအစင်းကထောင်ချီပြီးတော့ဆောက်သွားဖို့ရှိပါတယ်’’ ဟု ဒုဝန်ကြီးက ဖြည့်စွက်ပြောကြားသည်။

 လက်ရှိတွင် ကချင်ပြည်နယ်၊ မြစ်ကြီးနား - ဆွမ်ပရာ ဘွမ် - ပူတာအိုလမ်းပေါ်ရှိ တီယာန်ဇွပ်တံတား၊ ကယားပြည်နယ်တွင် ဒေါနိုးကူးတံတား၊ စစ်ကိုင်းတိုင်းဒေသကြီးအတွင်းရှိ ချင်းတွင်းမြစ်ကူးတံတားများဖြစ်သည့် ခန္တီး - ဆင်သေ - လဟယ် လမ်းပေါ်ရှိ ချင်းတွင်းတံတား (ခန္တီး)နှင့် အောင်ဇေယျ - ကက်သာ - ဟုမ္မလင်းလမ်းပေါ်ရှိ ချင်းတွင်းတံတား (ဟုမ္မလင်း) အပါအဝင် ကျန်တိုင်းဒေသကြီး၊ ပြည်နယ်များ၌ တည်ဆောက်ပြီးသည့် တံတားများစွာရှိကြောင်း ဝန်ကြီးဌာနက ထုတ်ပြန်ထားသည်။

 ထို့အပြင် တနင်္သာရီတိုင်းဒေသကြီးတွင် သမုတ်လွတ်လွတ်တံတား၊ ပုလုံးတုံးတုံးတံတားနှင့် တနင်္သာရီတံတားများအပါအဝင် လိုအပ်သည့် နေရာများ၌ ဆက်လက်တည်ဆောက်နေပြီး ချင်းပြည်နယ်တွင် ကုလားတန် (ပလက်ဝ) တံတားကို ယခုနှစ် ဘက်ဂျက်ကာလအတွင်း အပြီးတည်ဆောက်မည် ဖြစ်ကြောင်း ဝန်ကြီးဌာနက သတင်းထုတ်ပြန်ချက်တွင် ပါရှိသည်။