ဖိလစ်ပိုင်ကုမ္ပဏီဖြစ်သည့် Ayala က Yoma Group တွင် အမေရိကန်ဒေါ်လာ ၂၃၇ ဒဿမ ၅ သန်း ရင်းနှီးမြှုပ်နှံသွားမည်ဖြစ်ကြောင်း သိရှိရသည်။
Yoma Group ၏ကုမ္ပဏီနှစ်ခုမှအသစ်ထုတ်ဝေပေးမည့်ရှယ်ယာများ၏ဈေးနှုန်းများအရ Yoma Strategic ၏ ရှယ်ယာတစ်စုလျှင် စင်ကာပူဒေါ်လာ ၄၅ ပြားဖြစ်ပြီး အဆိုပါဈေးနှုန်းသည် ၂၀၁၉ နိုဝင်ဘာလ ၁၂ ရက်တွင် အလေးတင်သတ်မှတ်ထားသောဈေးနှုန်းအပေါ် ပရီမီယံကြေး ၃၆ ဒဿမ ၅ ရာခိုင်နှုန်းကိုယ်စားပြုကြောင်း သိရသည်။
ဖိလစ်ပိုင်ကုမ္ပဏီ Ayala သည် Yoma Group တွင် အစုရှယ်ယာ ၂၀ ရာခိုင်နှုန်းရင်းနှီးမြှုပ်နှံခြင်းသည် Yoma Strategic နှင့် FMI ကုမ္ပဏီတွင် ဒုတိယအကြီးဆုံးရှယ်ယာရှင်ဖြစ်လာမည်ဖြစ်ကြောင်း သိရသည်။
“ မြန်မာနိုင်ငံမှာရှိတဲ့ကျွန်တော်တို့စီးပွားရေးလုပ်ငန်းတွေအတွက် Ayala နဲ့ပူးပေါင်းဆောင်ရွက်သွားမှာဖြစ်ပါတယ်။ အဲဒီကုမ္ပဏီရဲ့ ကျွမ်းကျင်မှုနဲ့ လုပ်ငန်းအတွေ့အကြုံတွေကိုယူပြီးတော့၊ လက်ရှိပြီးသားလုပ်ငန်းတွေ အလားအလာကောင်းတဲ့အခွင့်အလမ်းသစ်တွေကို မြန်မာနိုင်ငံမှာ ရှာဖွေလုပ်ဆောင်သွားမှာဖြစ်ပါတယ်”ဟု Yoma Strategic နှင့် FMI ကုမ္ပဏီတို့၏အမှုဆောင်ဥက္ကဋ္ဌဖြစ်သူ ဦးသိမ်းဝေက ပြောသည်။
ဦးသိမ်းဝေသည် မြန်မာနိုင်ငံ၏ ထိပ်တန်းစီးပွားရေးလုပ်ငန်းရှင်များထဲမှ တစ်ဦးအပါအဝင်ဖြစ်ပြီး စတော့အိတ်ချိန်း လုပ်ငန်းအပါအဝင် ရန်ကုန်မြို့သစ်စီမံကိန်း၊ အိမ်ရာစီမံကိန်းအစရှိသည့် လုပ်ငန်းများစွာကို ဆောင်ရွက်နေသူဖြစ်ကြောင်း သိရသည်။
