ရန်ကုန်အရှေ့ပိုင်းခရိုင် ဒဂုံဆိပ်ကမ်းမြို့နယ် (၉၂) ရပ်ကွက်၊စစ်တောင်းရိပ်မွန်အိမ်ရာ ပိတောက်ကွေ့လမ်းမနံဘေးရှိ ယုဇနမြို့တော်ဈေး ဆောက်လုပ်ပြီးစီးပြီဖြစ်၍ မကြာမီ ဖွင့်လှစ်တော့မည်ဖြစ်ကြောင်းသိရသည်။
ဈေးသစ်တွင် သတ်မှတ်ထားသည့် A မှ H အထိ အတန်းလိုက် ဆိုင်ခန်းတစ်ခန်းလျှင် ခြောက်ပေပတ် လည် မြေပြင်ဆိုင်ခန်းပေါင်း ၇၃၀ ရှိကြောင်းသိရသည်။
တရားမဝင်ဈေးသည်များသည် (၉၄) ရပ်ကွက် ယုဇနဥယျာဉ်မြို့တော် ကံ့ကော်လမ်းမကြီး၏ လမ်းဘေးဝဲယာတစ်လျှောက်တွင် ဈေးရောင်းချလျက်ရှိရာ မြို့နယ်စည်ပင်သာယာရေးကော်မတီအဖွဲ့ဝင်နှင့်စည်ပင်ဝန်ထမ်း များ၊သက်ဆိုင်ရာဌာနမှဦးစီးအရာရှိနှင့်ဝန်ထမ်းများပါဝင်သော ပူးပေါင်းအဖွဲ့ဝင်သည် မြေပြင်ကွင်းဆင်း၍ လမ်းဘေး ကျူးကျော်ဈေးသည်များကို ဈေးသစ်အတွင်းတရားဝင် ဈေးရောင်းချနိုင်ရေးအတွက် ဈေးသည် ၇၀၀ ရာ ခန့်ကို ဈေးဆိုင်တစ်ဆိုင်ချင်း ဈေးသည်တစ်ဦးချင်းစီအလိုက် စာရင်းကောက်ယူမှတ်တမ်းပြုစုပြီးဖြစ်ကြောင်း သိရသည်။
သက်ဆိုင်ဌာနက လုပ်ငန်းပိုင်းဆိုင်ရာ ဆောင်ရွက်ချက်များကို စီစဉ်ဆောင်ရွက်ပြီးစီးပါက ယုဇနမြို့တော်ဈေးသစ်ကို မကြာမီဖွင့်လှစ်ပေးမည်ဖြစ်ကြောင်း မြို့နယ်စည်ပင်သာယာရေးကော်မတီမှ သိရသည်။
